Am diesjährige Jodlerobe hei mir Jodler u Jodlerinne vom Jodlerklub Bärgbrünneli üs bsungers de früehligshafte Repetoire-Lieder gwidmet. Unger dr Leitig vom Res Frank hei mir jewyls die schöne Obe u Nomittag mitem Lied "Yohr y Yohr us " vom Matthias Zogg gstartet. Mit dr Sunne im Saal isches wyter gange mit "Aemmitaler Alpuffahrt" vom Oskar Friedrich Schmalz, "Sunntig" vom Hans Müller Luchsinger, "Alpzyt" vom Emil Herzog, "Chum Lueg" vom Hannes Fuhrer u dr krönend Abschluss vom Programm mit em passende Lied "E schöne Tag" vom Josef Dubbach. Es isch e Gnuss gsi vor däm motivierte u zfridnige Publikum üsi Vorträg chönne zum Beschte zgäh. Am Friti Obe hei mir Ungerstützig vo de klare u fyne Stimme vom Tschiferli-Cheerli Kägiswil übercho.D'Monika Ettlin het mit ihrne Jodlerinne d' Lieder "Hech obä Juiz" vom Ruedi Rymann, "Sunnästrahlä" vom Hannes Fuhrer, Bärglerchoscht" vom Fridolin Haldi, "Es strahlends Lache" vom Ruedi Roth, "Tschiferli-Juiz" vor Dirigäntin Monika Ettlin, u "we d'Schwälbeli i Süde zieh" vom Adolf Stähli,ahgstumme. Zwüsche de Jodulieder u nachem Konzärt zum Tanz ufgspiut, het die bekannti Familie Lehmann vo Choppige mit ihrer lüpfige Örgelimusig. Es isch schön, seie jedes Johr bi üs am Jodlerobe dörfe z'begrüesse! Am Samschti Nomittag hei mir üs bsungers gfröit uf Bsuech vom Oberämmitau. Dr Jugendjodlerchor vo Langnou unger dr Leitig vor Annelies Mosimann hei mit voller Überzügig u Härzbluet sächs Lieder zum Beschte gäh. Im Saau isches stiu gsi u sie hei d'Sunne vo dusse uf d'Bühni zouberet. De Nachwuchsörgeler vo Langnou isch dr Ehrgiz is Gsicht gschribe gsi. Mit flinke Finger hei sie üse Nomittag verschöneret . Bereits si mir i Samschti Obe gstartet. Vou Motivation u Fröid hei mir üsem letschte Konzärtobe vo däm Johr entgägegluegt. Dr Jodlerklub Bärgglöggli Steinhuserberg het üs Entlebuecher-Choscht mitbrocht. Es tuet guet u isch schön gsi, mou chly öppis angers z'ghöre. Unger dr Leitig vor Renate Michel Steffen hei sie üs d'Lieder "Der Wildhüeter" vom Edi Gasser, "Es treichlet heizue" vom Alfons Gugler, "s'Jodlerhärz" vom Walter Stadelmann, "Bim Brüedere" vom Ruedi Bieri, "Enzischwand-Jutz" vom Franz Stzadelmann u "Geissbüehler Trutzliedli" vom Robert Felmann, vortreit. Mängisch hei mir veiechly guet müesse lose, dass mir dr Dialäkt verstange hei. Ou während däm Konzärt u im 2. Teu hei mir chönne uf Örgeler zeue. S'Schwyzerörgeliquartett Hiubi Chiubi het mit ihrer rassige Musig mängs Tanzbei chönne uf d'Bühni locke u üs bis wyt id'Nacht bi gueter Stimmig bhautet. Mir danke au üsne Gaschtformatione vo ganzem Härze u hoffe, dass mir's bire angere Glägeheit wieder zämä chöi Luschtig ha. Näbscht dr folklorische Ungerhautig a üsem Jodlerobe hei mir e wunderschöni, begehrti Tombola chönne ahbiete. Ou üsi Jodlerbar isch yfrig bsuecht worde so dass ou dert no mänge eis oder meh trunke oder gjützlet het. Mir chöi ufene zfridnige, abwächsligsryche u ungerhautsame Jodlerobe zrüggluege. Härzleche Dank au dene wo zu däm guete Glinge öppis bytreit hei, ohni öich giengs nid!!!